Hafnardagar 2013 verða um sjómannadagshelgina, 30. maí til 2. júní
Fjölmargt framundan á Hafnardögum
Þá er undirbúningur Hafnardaga hafinn af krafti. Dagskráin verður með nokkuð hefðbundnu sniði með opnunarhátíð fimmtudaginn 30. Maí, þar sem einnig verður opnuð sýning Byggðasafns Ölfuss og afhent menningarverðlaun. Í sýningarrými bókasafnsins, Gallerí undir stiganum, hefur Róbert Karl Ingimundarson, sem er framkvæmdastjóri Hafnardaga 2013, sett upp ljósmyndasýningu. Myndirnar eru allar teknar um Hafnardaga á síðasta ári og eru íbúar hvattir til að kíkja á sýninguna og komast þannig í réttu stemninguna fyrir hátíðarundirbúninginn. Formleg opnun ljómsyndasýningarinnar er föstudaginn 10. maí kl. 18:00.
Vakin er athygli á því að þeir sem ætla að taka þátt í kappróðrinum þurfa að skrá þátttöku hjá Ásgeiri Guðmundssyni í síma 898 3196 og þátttökuskráning á markað í skólanum er hjá Róberti Karli í síma 695 3200 eða hjá Barböru, menningarfulltrúa í síma 863 6390.
Aftur verður hverfum skipt eftir litum og íbúar hvattir til að taka virkan þátt í að skreyta og undirbúa götugrill. Á föstudeginum verður farið í skrúðgöngu sem endar í skrúðgarðinum þar sem boðið verður upp á margvísleg skemmtiatriði. Enn vantar sjálfboðaliða í hverfastjórnir eða –ráð og er þeir sem áhuga hafa hvattir til að setja sig í samband við Róbert Karl.
Höldum skemmtilega hátíð í bænum okkar um sjómannadagshelgina.